Орал қаласындағы үш мешіттің ең жаңасы - 2005 жылдың қарашасында ашылған облыстық мешіт. Сыйымдылығы 1500 адамға жететін имандылық ордасы бірнеше мемлекеттің қатысуымен салынған. Мешіттегі негізгі залдың төбесін жабатын күмбез Италияда жасалған витражды әйнектерден құрастырылған. Еденге салынған кілемнің барлығы дерлік Францияда тоқылып, ғимаратты әрлеуде кеңінен қолданыс тапқан ақ мәрмәр Қытайдан  әкелінген екен. Жылдың суық маусымдарында мешітте заманауи үлгідегі жылыту жүйесі іске қосылады.